कांग्रेसयात सहमतिइ वयेत एमालेया इनाप
भदौ १४ गते लिपा आन्दोलन यायेगु ख्याच्वः बिउगु नेपाली कांग्रेसयात सहमतिइ वयेत सत्तारुढ नेकपा (एमालें) इनाप याःगु दु ।
एमाले संसदीय दलया मंगलवाः च्वंगु मुँज्यां शान्ति प्रक्रिया क्वचायेकेत व संविधान निर्माण यायेत सहमति व सहकार्य आवश्यक जूगु धासें सहमतिया लँपु ज्वनेत कांग्रेसयात इनाप याःगु दु । कांग्रेस राजनीतिक दलत दथुइ भदौ १४ गते दुने संविधानया एकीकृत मस्यौदा पेश यायेगु सहमतिपाखें लिचिलेत स्वःगु निष्कर्ष नं एमालें पिकाःगु दु ।
निन्हु न्ह्यः काभ्रेया धौख्यलय् क्वचाःगु कांग्रेस जिल्ला सभापतितय् भेलां भदौ १४ गते नं संविधानया मस्यौदा मवसाः आन्दोलन यायेगु ख्याच्वः बिउगु खः । कांग्रेसं याःगु उगु निर्णयप्रति आपत्ति प्वंकूसें एमालें कांग्रेसयात संविधान निर्माणय् ध्यान केन्द्रीत यायेत इनाप याःगु खः ।
अथेहे सिंहदरवारस्थित संसदीय ज्याकूथी च्वंगु मुँज्याय् एमालेया सभासद्तय्सं विराटनगरया पत्रकार खिलानाथ ढकालयात आक्रमण याःगु अभियोग लानाच्वम्ह युथ फोर्स मोरङया अध्यक्ष पर्शुराम बस्नेतयात प्रहरीया जिम्मा लगे यायेमाःगु बिचाः प्वंकूगु खः । पत्रकार अक्रमणया हुनिं पार्टीया हे बदनाम जूगुलिं दोषीयात प्रहरीया जिम्मा लगे यायेमाःगु बारे मुँज्याय् सहलह जूगु खः ।
News Location:
