पर्शुराम दोषी ठहर जूसाः जिं हे प्रहरीयात लःल्हाये : बस्नेत
नेकपा (एमाले)या भातृ संगठन युथ फोर्सया अध्यक्ष महेश बस्नेतं विराटनगरया पत्रकार खिलाराज ढकालयात आक्रमण याःगु अभियोग लानाच्वम्ह पर्शुराम बस्नेत दोषी ठहर जूसाः थःम्हं हे प्रहरी समक्ष लःल्हायेगु धयादीगु दु ।
रफ्त सञ्चारं थौं ख्वपय् याःगु छगू ज्याझ्वलय् वय्कलं पर्शुराम बस्नेत थःनाप हे दुगु दावी यानादिसें संसदीय समितिं छानबिन यानाः दोषी ठहर याःसा १ घण्टाया दुने थःम्हं हे प्रहरी समक्ष लःल्हायेगु दावी यानादिल । तर, अज्याःगु छानबिन राजनीतिक पूर्वाग्रहया आधारय् मजूसें पुलांपिं न्यायाधीश व मानवअधिकारवादीतय्सं यायेमाःगु धयादिल ।
पत्रकारयात आक्रमण जूगु घटना गलत जूगु धयादिसें बस्नेतं पत्रकार ढकालया आक्रमणय् पर्शुरामया संलग्नता मदुगु दावी यानादिल । वय्कलं सञ्चार मध्यमतय्सं पर्शुरामयात घटनाया दोषी क्यनेगु नापं युथ फोर्स व नेता केपी शर्मा ओलीयात नं बदनाम यायेत स्वयाच्वंगु द्वपं बियादिल ।
उखे पत्रकार ढकालया आक्रमणय् संलग्न छम्हेसित प्रहरीं थौं विराटनगरय् ज्वंगु दु । प्रहरीं युथ फोर्सया दुजः मनोज राईयात महेन्द्र मोरङ क्याम्पस नापसं ज्वंगु खः । थ्वस्वयां न्ह्यः प्रहरीं ढकालया आक्रमणय् संलग्न मेम्ह अभियुक्त रोहित कोइरालायात घटना जूगु बहनी हे ज्वंगु खः ।
नेपाल पत्रकार महासंघया छानबिन समितिं तयार याःगु प्रतिवेदनय् पत्रकार ढकालयात पर्शुराम बस्नेतया निर्देशनय् रोहित कोइराला, मनोज राई लागयतं आक्रमण याःगु खँ न्ह्यथनातःगु दु ।
