शान्ति प्रक्रिया क्वचायेकेत सहमतिय सरकार : गच्छदार
मधेशी जनअधिकार फोरम लोकतान्त्रिकया नायः विजयकुमार गच्छदारं शान्ति प्रक्रिया क्वचायेकेगु निंतिं राष्ट्रिय सहमतिय सरकार आवश्यक जूगु खँ धयादीगु दु ।
चितवनया नारायणगढय् सोमवाः पत्रकारतनाप खँल्हाबंला यानादिसें वय्कलं राष्ट्रिय सहमतिया सरकार बिना शान्ति प्रक्रिया क्वचायेकेमफइगु धयादिसें सहमतिय सरकारया निंतिं मार्ग प्रशस्त यायेत सरकारयात इनाप यानादिल ।
प्रधानमन्त्री झलनाथ खनालं राजीनामा मबीकं सहमति सम्भव मदुगु दावी यानादिसें नेता गच्छदारं न्यागू बुँदे सहमति कथं प्रधानमन्त्रीं तत्काल राजीनामा बीमाःगु धयादिल । वय्कलं माओवादी नेतृत्वय् सहमतिय सरकार गठन जूसां थःपिंत आपत्ति मदुगु धयादिसें यदि प्रमुख स्वंगू दलंतय्सं सहमतिय सरकार गठन यायेमफुसाः मधेशवादी दलतय् नेतृत्वय् सरकार गठन यायेमाःगु धयादिल ।
वय्कलं न्हूगु संविधान निर्माण न्ह्यः हे शान्ति प्रक्रिया व सेना समायोजनया ज्या क्वचायेमाःगु नं धयादिल । सेना समायोजनया झ्वलय् माओवादीया खुद्वः स्वयां अप्व लडाकुत समायोजन यायेमज्यूगु धयादिसें वय्कलं मधेशी समुदायया धाःसा झिद्वःया ल्याख्य् सेनाय् समूहगत समायोजन यायेमाःगु माग यानादिल ।
