'शान्ति प्रक्रिया क्वचायेधुंकाः जक लोकतान्त्रिक संविधान सम्भव'
नेपाली कांग्रेसया जिल्ला सभापतितय् भेलां शान्ति प्रक्रिया क्वचायेधुंकाः जक संविधानसभापाखें लोकतान्त्रिक संविधान सम्भव जूगु निष्कर्ष पिकाःगु दु । झिंस्वंगू बुँदे प्रस्ताव पारित यासें आइतवाः क्वचाःगु कांग्रेसया जिल्ला सभापतितय् भेलां शान्ति प्रक्रियाया विषयत समग्रय् समाधान यायेधुंकाः हे संविधानसभां लोकतान्त्रिक संविधान जारी यायेफइगु निष्कर्ष पिकागु खः ।
निन्हुन्यंक काभ्रेया धौख्यलय् जूगु जिल्ला सभापतितय् भेलां प्रमुख स्वंगू दलत दथुइ न्यागू बुँदे सहमति यानाः संविधानसभाया म्याद स्वलाया निंतिं थप याःसां प्रधानमन्त्री व माओवादी उगु सहमति कार्यान्वयन यायेत इमान्दार मजूगु द्वपं नं बिउगु दु ।
माओवादीं शिविरय् दुपिं लडाकु व ल्वाभःया नियन्त्रण व निर्देशन व्यवहारिक रुपं अझ नं मत्वःतुगु धासें भेलां यदि माओवादीं लोकतन्त्रया आधारभूत मूल्य व मान्यता माने मयासाः भदौ १४ गते निसें कांग्रेसं शान्तिपूर्ण संघर्षपाखें लोकतान्त्रिक आन्दोलन न्ह्याकीगु खँ न्ह्यथंगु दु ।
संविधानसभाया म्याद थप यायेत कांग्रेसं न्ह्यब्वःगु झिगू बुँदे मार्गचित्र कथं हे शान्ति प्रक्रियात निष्कर्षय् थ्यंकेत ठोस पलाः ल्ह्वनेत जिल्ला सभापति भेलां कांग्रेस केन्द्रीय कार्यसमितियात इनाप याःगु दु ।
अथेहे जिल्ला सभापति भेलां विराटनगरया पत्रकार खिलानाथ ढकालयात जूगु सांघातिक आक्रमणया भर्त्सना यासें दोषीयात कडा कारवाही यायेत माग याःगु दु । उगु भेलां जिल्ला सभापतितय् राष्ट्रिय भेला म्होति नं दँय् छक्व अनिवार्य रुपं सःतेत नं माग याःगु दु ।
News Location:
