'बस्नेतया हे निर्देशनय् पत्रकार ढकालयात आक्रमण'
पत्रकार महासंघपाखे आन्दोलनया घोषणा
विराटनगरया पत्रकार खिलानाथ ढकालयात याःगु आक्रमण बारे छानबिन यायेत नेपाल पत्रकार महासंघं नीस्वंगु अनुसन्धान पुचलं युथ फोर्स मोरङया नेता पर्शुराम बस्नेतया हे निर्देशनय् उगु आक्रमण जूगु ठहर याःगु दु ।
महासंघया मूछ्याञ्जे ओम शर्माया संयोजकत्वय् मोहनकाजी न्यौपाने, दिलिप थापा मगर व विक्रम निरौला दुथ्याःगु अनुसन्धान पुचलं थौं छगू पत्रकार सम्मेलन यानाः थःगु प्रतिवेदन सार्वजनिक याःगु खः । प्रतिवेदन सार्वजनिक यासें उगु पुचलं पत्रकार ढकालयात बस्नेतया निर्देशनय् युथ फोर्स विराटनगरया नायः रोहित कोइराला व दुजः मनोज राई सहितं आक्रमण याःगु खँ न्ह्यथंगु दु ।
पत्रकारयात आक्रमण यायेत निर्देशन बिउम्ह बस्नेतयात एमाले जिल्ला कमिटी मोरङ, युवा संघ नेपाल व युथ फोर्स संरक्षण बियातःगु खँ प्रतिवेदनय् न्ह्यथंगु दु । प्रतिवेदनय् बस्नेत पूर्वाञ्चल क्षेत्रया हे अगुवा गुण्डा जूगु खँ नं न्ह्यथनातःगु दु ।
थ्वहे दथुइ पत्रकार महासंघं थीथी थासय् पत्रकारतय्त जुयाच्वंगु आक्रमणया विरोधय् चरणबद्ध आन्दोलनया घोषणा याःगु दु । महासंघं सरकारं पत्रकार आक्रमणय् संलग्न दोषितय्त कारवाही यायेगु प्रतिबद्धता प्वंकूसां कारवाही धाःसा मयागु धासें आन्दोलनया घोषणा याःगु ख: ।
शनिवाः च्वंगु महासंघया आकस्मिक मुँज्यां जेठ २९, ३० व ३१ गते पत्रकारतय्सं हाकुगुपट्टी चीनाः विरोध यायेगु निर्णय याःगु दु । अथेहे अन्तराष्ट्रिय पत्रकार महासंघ व राष्ट्रिय मानवअधिकार आयोगयात घटनाया बारे जानकारी बीगु नापं विराटनगर घटना बारे पार्टीया धारणा सार्वजनिक यायेत एमालेयात ज्ञापनपत्र बीगु निर्णय नं महासंघं याःगु दु ।
अथेहे असार १ गते येँया माइतीघर मण्डला व फुक्कं जिल्लाया जिल्ला प्रशासन ज्याकू न्ह्यने सञ्चार सामाग्री सहित धर्ना बीगु, २ गते येँ नापं थीथी जिल्लाया सम्पादकत दथुइ अन्तर्क्रिया यायेगु, ३ गते ट्रेड युनियननाप अन्तर्क्रिया, ४ गते संविधानसभा भवन निसें माइतीघर मण्डाला तक व जिल्लाया सदरमुकामय् दोषियात कारवाही यायेत माग यासें प्रदर्शन यायेगु ज्याझ्वः क्वःछिउगु दु ।
