सेनाया हे प्रस्ताव व मापदण्ड कथं समायोजन : रक्षामन्त्री
रक्षामन्त्री विष्णु पौडेलं सेनाया हे प्रस्ताव व मापदण्ड कथं माओवादी लडाकुया समायोजन जुइगु खँ धयादीगु दु । वय्कलं माओवादीं सेनां न्ह्यब्वःगु समायोजनया प्रस्ताव स्वीकार यायेधुंकूगुलिं आः सेनाया हे मापदण्ड कथं समायोजन यायेत नं माओवादी तयार जुइमाःगु धयादिल ।
'माओवादीं सेनां न्ह्यब्वःगु समायोजन प्रस्ताव स्वीकार यायेगु धायेधुंकल' रिपोटर्स क्लबं शनिवाः येँय् याःगु साक्षात्कार ज्याझ्वलय् मन्त्री पौडेलं धयादिल, 'आः सेनाया प्रस्ताव स्वीकार यायेधुंकाः सेनाया मापदण्ड स्वीकार यायेमखु धाये दइमखु ।'
सेनाया स्थापित मान्यता कथं समायोजन यायेमाःगु धयादिसें मन्त्री पौडेलं समूहगत समायोजनया सम्भावना मदुगु स्पष्ट यानादिल । वय्कलं व्यक्तिगत योग्यताया आधारय् समायोजन जुइगु न्ह्यथनादिसें समायोजनया इलय् शिक्षा, तालिम, दँ आदिया बारे धाःसा लचकता क्यनेफइगु धयादिल ।
समायोजन जुइगु लडाकुतय् ल्याःया बारे राजनीतिक दलत सहमतिया नापसं थ्यनेधुंकूगु दावी यानादिसें पौडेलं छुंया ल्याखय् जक दलत दथुइ सहमति जुइमफुगु धयादिल । वय्कलं भदौ १५ गते दुने लडाकु व ल्वाभः राज्यया नियन्त्रणय् वइगु धयादिल । 'यदि भदौ १४ दुने नं थुगु ज्या पूवंकेमफुसाः हानं संविधानसभाया म्याद थप यायेत राजनीतिक दलतय्सं जनतानाप इनाप यायेगु नैतिकता दइमखु' वय्कलं धयादिल ।
मधेशवादी दलतय्सं झिद्वःया ल्याखय् मधेशी समुदाययात सेनाय् समायोजन यायेमाःगु धका: त:गु प्रस्ताव अस्वीकार यानादिसें मन्त्री पौडेलं समूहगत प्रवेश सम्भव मदुगु धयादिल । वय्कलं राज्यया फुक्कं अंगयात समावेशी दयेकेत सरकार प्रतिवद्ध दुगु नं धयादिल ।
News Location:
