सभामुख नेम्वाङ प्रचण्ड निवासय्
सभामुख सुभाषचन्द्र नेम्वाङ व एनेकपा (माओवादी)या नायः पुष्पकमल दाहाल 'प्रचण्ड' दथुइ थौं खँल्हाबंला जूगु दु ।
येँया न्हू बजारस्थित प्रचण्डया छेँय् निम्ह नेतात दथुइ संविधान निर्माण बारे विवाध समाधान उपसमितिं याःगु प्रगतिया बारे खँल्हाबंला जूगु खः । प्रचण्डं उपसमितिं भदौ १ गतेया दुने संविधानया न्हापांगु मस्यौदा हयेगु धकाः समितिं क्वःछिउगु समयसिमायात ध्यानय् तयाः उपसमितिं ज्या याइगु धयादिल । सभामुख नेम्वाङं संविधान निर्माण याकन यायेत माओवादीं यानाच्वंगु पहलया बारे नं च्यूताः प्वंदीगु खः ।
अथेहे संविधानसभाया म्याद थप याये न्ह्यः प्रमुख स्वंगू दलत दथुइ जूगु न्यागू बुँदे सहमति अनुगमनया निंतिं सभामुखया संयोजकत्वय् सर्वदलीय संसद अनगमन समिति नीस्वनेगु बारे नं खँल्हाबंला जूगु खः । न्यागू बुँदे सहमति जूगु झिन्यान्हु दयेधुंकाः नं अनुगमन समिति नीस्वनेमफुगु धासें सभामुख नेम्वाङं समितिया पूर्णता बीत इनाप यानादीगु खः । लिसलय् प्रचण्डं थःगु पार्टीपाखें याकनं हे नां छ्वयाः अनुगमन समितियात पूर्णता बीगु धयादिल ।
उगु इलय् सभामुख नेम्वाङं प्रचण्डया स्वास्थ्य अवस्थाया बारे नं जानकारी कयादीगु खः । प्रचण्ड म्हिग सुथंनिसें म्हःमफया छेँय् हे आराम यानाच्वनादीगु खः ।
News Location:
