बाराय् गोलीं कयेकाः छम्ह कर्मचारीयात स्यानाबिल

हुलाक ज्याकू कलैयाय् ज्या याइम्ह छम्ह कर्मचारीयात शुक्रवाः बहनी अज्ञात पुचलं गोलीं कयेकाः स्यानाबिउगु दु । शुक्रवाः बहनी ११ बजे भोजं छेँय् लिहांवयाच्वम्ह बरियारपुर गाविस १या ४८दँया धिरज महतोयात गोलीं कयेकाः स्यानाबिउगु खः । छ्योनय् गोलीं लाःम्ह महतो घटनास्थलय् हे मदुगु खः । महतोया सीम्ह पोष्टमार्टमया निंतिं कलैया अस्पतालय यंकूगु दु । नेपाल निजामती कर्मचारी युनियन बारा कार्य समितिया नं दुजः जुयाच्वम्ह महतोयात सुना व छाय् स्याःगु बारे सीकेमफुनीसां प्रहरीं व्यक्तिगत रिसिवीया हुनिं वयात स्याःगु अनुमान याःगु दु । घटना बारे प्रहरीं अनुसन्धान न्ह्याकेधुंकूगु दुसाः अनुसन्धानया झ्वलय् शंकास्पद स्वम्हेसित नं प्रहरीं ज्वंगु दु ।