राज्य पुनर्संरचनाया प्रतिवेदन हानं चाःहिल
येँ (सन्ध्या टाइम्स)/न्हूगु संविधान निर्माणया नितिं विवादित जुयाच्वंगु विषय ज्यंकेत गठन याःगु उपसमितिया संयोजक एवं माओवादी अध्यक्ष प्रचण्ड म्हं मफयाः थौंया बैठकय् उपस्थित जुया मदिल। वय्कः मदुगु थौंया बैठकं राज्य पुनर्संरचना समितिया सवाल तसकं जटिल जूगुलिं राजनीतिक तहलय् हे सहलह ब्याके माःगु व उकिया निंतिं हाकनं बिचाः यायेमाःगु जूगुलिं धासें उगु प्रतिवेदनयात संविधानसभाया सचिवालयय् छ्वयेगु निर्णय याःगु दु। राज्य पुनर्संरचनाया सवालय् ७८ गू बुँदाय् विवाद दु धकाः धलः दयेकाः सचिवालयपाखें संवैधानिक समिति जुयाः उपसमितिइ वंगु खःसा सहमति जुइधुंकूगु व बहुमतं पारित याःगु विषययात तकं विवादया विषय धकाः न्ह्यब्वःगु खँयात कयाः आदिवासी जनजातितय्सं ब्यापक रुपं विरोध याना वयाच्वंगु खः ।
नेकां सभापतियात ज्ञापन
आदिवासी जनजाति संयुक्त संघर्ष समितिं थौं सुथय् नेपाली कांग्रेसया सभापति सुशील कोइरालायात ज्ञापनपात्र लःल्हायेत। समितिया पदाधिकारीतय्सं आदिवासी जनजातिय्गु भावना कथं पहिचानया आधारय् राज्य पुनर्संरचना मयासे कांग्रेसं धयाच्वं थें भौगोलिक आधारय् जक यात धाःसा राजनीतिक सहमति ला जुइफु तर देशय् शान्ति धाःसा मवयेफु धकाः ख्याच्वः बिउगु खःसा कोइरालां थ्व गम्भीर विषय जूगुलिं पार्टी दुने सहलह ब्याकेगु जुइ धयादीगु खः। अथे हे जनजाति नेतातय्सं आःया अवस्थाय् राज्य पुनर्संरचना आयोग दयेकेगु पायछि जुइ मखु धकाः नं सभापतियात सुझाव बिया थकूगु खः ।
