'सुडान घोटाला बारे दकलय् न्हापां छानबिन यायेत जिं हे निर्देशन बियागु'
पुलाम्ह गृहमन्त्री भीम रावलं सुडान घोटाला प्रकरण बारे दकलय् न्हापां छानबिन यायेत थ:म्हं हे निर्देशन बियागु खँ धयादीगु दु । वय्कलं थः गृहमन्त्री जुयाच्वंगु इलय् घोटाला प्रकरणया बारे रहस्योदघाटन यानागु दावी यानादिल ।
अख्तियार दुरुपयोग अनुसन्धान आयोगं पुलांपि आइजीपी सहित स्वीखुम्हेसित सुडान घोटाला प्रकणरय् मुद्दा दयार याःगु छुं न्हि लिपा पुलाम्ह गृहमन्त्री रावलया थुगु धापु सार्वजनिक जूगु खः । रिपोटर्स क्लबं थौं येँय् याःगु साक्षात्कर ज्याझ्वलय् वय्कलं थःम्ह सुरु याकागु छानबिन लिपा एपीसी सम्बन्धी दक्वं ज्या दिकेत नं निर्देशन बियागु धयादिल ।
एपीसी न्यायेगु खँय् थःगु संलग्नता अस्वीकार यानादिसें नेता रावलं पूर्वाग्रही रुपं थःगु नां नं उगु प्रकरणय् स्वाकूगु धासें आपत्ति प्वंकादिल । वय्कलं थः २०६६ साल असार ३ गते गृहमन्त्री जुयागु धयादिसें एपीसी न्यायेगु फुक्कं प्रक्रिया २०६४ भदौ १० गते दुने फुक्कं क्वचायेधुंकूगु जानकारी बियादिल । वय्कलं २०६५ साल भदौया दुने फुक्कं एपीसी सुडानय् थ्यनेधुंकूगु जानकारी नं बियादिल ।
News Location:
