राज्य पुनर्संरचनाया प्रतिवेदन संवैधानिक समितिया सचिवालयय् छ्वल
संवैधानिक समितिं थःगु समिति मातहतया उपसमितिइ छ्वःगु राज्य पुनर्संरचनाया प्रतिवेदनयात उपसमितिं संवैधानिक समितिया सचिवालयय् छ्वःगु दु ।
उपसमितिया थौं च्वंगु मुँज्यां राज्य पुनर्संरचनाया विषयया बारे राजनीतिक नेतृत्व तहलय् सहलह यायेमाःगु धासें संवैधिनिक समितिया सचिवालयय् छ्वयेगु निर्णय याःगु खः । राज्य पुनर्संरचनाया विवादित विषयलय् सहलह यानाः एकीकृत व व्यवस्थित खाका तयार यायेगु जिम्मा नं सचिवालययात बिउगु दु ।
उपसमितिया संयोजक पुष्पकमल दाहाल 'प्रण्चड' अनुपस्थित जुइवं थौंया मुँज्या कांग्रेस नेता रामचन्द्र पौडेलया अध्यक्षताय् च्वंगु खः । पौडेलं राज्य पुनर्संरचनाया विषय गम्भीर जूगु धासें थकिया विषयलय् राजनीतिक नेतृत्वय् तकलय् विस्तृत सहलह आवश्यक जूगु धयादिल ।
म्हिगया मुँज्याय् क्वःछिउगु कथं शासकीय स्वरुप, निर्वाचन प्रणाली व राज्य पुनर्संरचनाया विषय ज्यंकेत स्वंगू कार्यदल नीस्वनेगु ज्या धाःसा थौं जुइमफुत । उपसमितिया मेगू मुँज्यां जेठ ३० गते सोमवाः च्वनीगु ज्याझ्वः दु ।
