भदौ १ गतेया दुने संविधानया मस्यौदा तयार याइगु
संवैधानिक समिति अन्तर्गया विवाद समाधान यायेत नीस्वंगु उपसमितिं संविधानया न्हापांगु एकीकृत मस्यौदा भदौ १ गतेया दुने हयेगु निर्णय याःगु दु ।
संविधानसभाया म्याद थप यायेधुंकाः न्हापांगु खुसिइ थौं च्वंगु उपसमितिया मुँज्यां भदौ १ गतेया दुने मस्यौदा तयार यायेगु कार्यतालिका दयेकूगु खः । अथेहे समितिं संविधान निर्माणया झ्वलय् प्रमुख विवादीत स्वंगू विषयत शासकीय स्वरुप, निर्वाचन प्रणाली व राज्य पुनर्संरचनाया बारे स्वंगू कार्यदल नीस्वना विवाद समाधान यायेगु खँ क्वःछिउगु दु । उगु स्वंगू कार्यदलय् च्वनीपिं दुजःतय् नां धाःसा कन्हय् च्वनीगु समितिया मुँज्यां क्वःछीगु जूगु दु ।
वंगु जेठ १८ गते च्वंगु संवैधानिक समितिया मुँज्यां माओवादी नायः पुष्पकमल दाहाल 'प्रचण्ड'या संयोजकत्वय् दुगु उपसमितिया म्याद प्यक्वःगु खुसिइ थप याःगु खः । उपसमितिं निसः स्वयां अप्व विवादीत विषयलय् सहलह यानाः ज्यंकेधुंकूगु दुसाः आः मुक्कं नीछगू विषलय् जक सहमति जुइ ल्यँ दनी ।
