सुडान प्रकरणया अभियुक्ततय्त झिंन्यान्हुया म्याद जारी
विशेष अदालतं सुडान प्रकणरया अभियुक्ततय्त झिंन्यान्हुया दुने अदालतय् उपस्थित जुइत म्याद जारी याःगु दु ।
बिशेष अदालतया अध्यक्ष गौरीबहादुर कार्की व दुजतः ओमप्रकाश मिश्र व केदारप्रसाद चालिसेया मंकाः इजलासं बुधवाः अभियुक्ततय्त झिंन्यान्हुया दुने अदालतय् उपस्थित जुइत म्याद जारी याःगु खः । न्याधीशतय्सं यदि अभियुक्तत झिंन्यान्हुया दुने अदालतय् उपस्थित मजूसाः अभियोग प्रमाणित जुइगु खँ न्ह्यथंगु दु । झिंन्यान्हुया दुने अभियुक्तत अदालतय् उपस्थित जुइवं इपिंनाप बयान कायेगु सुरु जुइ ।
अख्तियार दुरुपयोग अनुसन्धानं मंगलवाः सुडान घोटाला प्रकरणय् स्वम्ह पुलांपिं आइजीपीत सहित स्वीखुम्ह विरुद्ध विशेष अदालतय् मुद्दा दायर याःगु खः । अख्तियारं सुडानय् खटे जूपिं नेपाःया प्रहरीया निंतिं ४४ करोडया एपीसी लगायतया समान न्याःगु इलय् २८ करोड ८१ लख व खुइछद्वः ध्यबा भ्रष्टाचार जूगु ठहर यासें उगु मुद्दा दर्ता याःगु खः ।
