'लडाकुतय्त सम्मानजनक रुपं समायोजन यायेमाः'
एनेकपा (माओवादी)या लडाकु कमाण्डरतय्सं सेना समायोजन जुइगु इलय् लडाकुतय् सम्मानजनक समायोजन यायेमाःगु सुझाव पार्टी नेतृत्वयात बिउगु दु ।
माओवादी नायः पुष्पकमल दाहाल 'प्रचण्ड' सहितया नेतात नाप थौं खँल्हाबंला यासें नीछगूलिं लाडकु शिविरया कमाण्डरतय्सं मिश्रित फोर्स निर्माण यायेगु पार्टी नेतृत्व स्वीकार यायेगु धासें उकिया नेतृत्व धाःसा थःपिंत दयेमाःगु माग याःगु खः । नापं इमिसं अज्याःगु फोर्सय् समायोजन जुइपिंत इमिगु लडाकु दर्जा कथं हे समायोजन यायेत नं इनाप याःगु खः ।
सेना समायोजन विशेष समितिं लडाकुत रिग्रुपिङ् यायेगु व ल्वाभः लःल्हायेगु कार्यतालिका पितबीवं माओवादी नेतृत्वं लडाकु कमाण्डरतनाप सहलह याःगु खः । माओवादी नेतृत्वं पार्टीं याःगु निर्णय पलना यायेत निर्देशन बिउगु खःसा लिसलय् लडाकुया कमाण्डरतय्सं पार्टीं निर्णय यायेगु इलय् छगू मत जुयाः निर्णय यायेत सुझाव बिउगु खः । पार्टी नेतृत्वय् लडाकु समायोजन लगायत विषयलय् मतभेद जुयाच्वंगु इलय् लडाकुतय्सं अज्याःगु सुझाव बिउगु खः ।
