नेपाली जनता दल तज्यात
संविधानसभाय् निम्ह सभासद्त दुगु नेपाली जनता दल तज्याःगु दु । जनता दलया सभासद् विश्नाथ अग्रवालं पार्टी विभाजन यानाः थःगु नेतृत्वय् जनता दल युनाइटेड नांया न्हूगु पार्टी गठन याःगु ख: । जनता दलया अध्यक्ष हरिचरण साह थीथी आर्थिक अनियमितताय् संलग्न जूगु व भ्रष्टाचार याःगु धासें अग्रवालं थौं पार्टी विभाजन याःगु खः । अग्रवालं थौं हे सभामुख सभाषचन्द्र नेम्वाङ समक्ष न्हूगु पार्टी दर्ता याकूगु दु । पीम्ह केन्द्रीय दुजःत दुगु जनता पार्टी विभाजन जुइवं अग्रवाल नेतृत्वया न्हूगु पार्टीइ झिंन्हय्म्ह दुजःत वंगु दु ।
उखे निम्ह जक सभासद्त नं निगू पार्टीइ विभाजित जूगु दु । कुटनीटिक पासपोर्ट दुरुपयोग याःगु द्वपंलय् सभासद् पदं निलम्बनय् लानाच्वंम्ह गायत्री साह जनता दलया मेम्ह सभासद् खः । वय्क: नेपाली जनता दलय् हे च्वनादीगु दु । जनता दल औपचारिक रुपं विभाजित जुइवं आः संविधानसभाय् प्रतिनिधित्व याइगु दलया ल्याः स्वीगू थ्यंगु दु ।
