राष्ट्रपतिया पलाः मिभंकूतल्ले माओवादीं संसद अवरोध यानाच्वनीगु

एकीकृत नेकपा (माओवादीं) राष्ट्रपतिं ल्ह्वंगु पलाः मिभंकूतल्ले व्यवस्थापिका संसदय् अवरोध यानाच्वनेगु निर्णय याःगु दु ।

प्रधानमन्त्री निवास बालुवाटारय् सोमवाः सुथय् च्वंगु माओवादी केन्द्रीय सचिवालयया बैठकं सेनापतियात पदय् च्वनाच्वेत राष्ट्रपतिं ल्ह्वंगु पलाः मिभंकूतल्ले राष्ट्रिय सहमति निमार्ण यायेमफइगु निष्कर्ष पिकाःगु दु ।

राष्ट्रिय सहमतिया निंतिं थःपिंसं ल्ह्वंगु मागयात व्यवस्थापिका संसदय् प्रवेश याकेमाःगु अडान माओवादीं कयाच्वंगु दु । बैठकय् पार्टीं न्ह्यब्वःगु नागरिक सर्वोच्चता, रष्ट्रपतिया असंवैधानिक पलाः लगायत विषय संसद मार्फत सम्बोधन यासाः जक सदन चलेजुइ बीगु निर्णय याःगु दु ।