भदौ १० गते दुने सेना समायोजन यायेगु सहमति
माओवादी लडाकुया रेखदेख, समायोजन व पुनःस्थापना विशेष समितिं असार १० गतेया दुने सेना समायोजन यायेगु सहमति याःगु दु । थौं च्वंगु विशेष समितिया मुँज्यां लडाकुतय्त समायोजन यायेगु व इपिं नाप दुगु ल्वाभः नं सरकारयात भदौ १० गते दुने लःल्हायेगु सहमति याःगु खः ।
थ्वस्वयां न्ह्यः म्हिग च्वंगु विशेष समितिया मुँज्यां असार ५ गतेया दुने समायोजनया मोडालिटी तयार यायेगु निर्णय याःगु खः । अथेहे असार १० गते दुने लडाकु बर्गिकरण यायेत विज्ञत सम्मिलित पुचःयात शिविर छ्वयेगु व उगु पुचलं असार १३ गते निसें ज्या सुरु यायेगु खँ क्वःछिउगु खः ।
प्रधानमन्त्रीया नेतृत्वय् थौं च्वंगु विशेष समितिया मुँज्यां लडाकुतय् रिग्रुपिङ् यायेत सच्छि व नीखुम्ह विज्ञतय्त शुक्रवाःया दुने लडाकु शिविरय् छ्वयेगु निर्णय याःगु दु । उगु पुचलं सुरक्षा निकायलय् समायोजन जुइपिं, समाजय् पुनःस्थापना जुइपिं व स्वेच्छिक अवकास जुइपिं लडाकुतय्त स्वंगू शिविरय् रिग्रुपिङ् याइगु खँ धा:गु दु ।
