यलय् नेवाः गणकत हे वइगु
यल (सन्ध्या टाइम्स)/नेपालभाषा मंकाः खलः यलया कुतलय् यलया नेवाः वस्तीइ जनगणनाया निंतिं नेवाः गणकत हे वइगु जूगु दु ।
न्ह्यःने वयाच्वंगु राष्ट्रिय जन गणनाया झ्वलय् वंगु छुं दिं न्ह्यः जक पारिवारिक धलः दयेकःवःपिं गैर नेवाः सुपरभाइजरतय्सं नेवाःतय्गु त्वाः व जातया नां तकं च्वये मसःगु नापं वास्तविकतायात बेवास्ता यानाः विवरण च्वया यंकूगु खँ मंकाः खलःया ग्वसालय् जूगु सहलह ज्याझ्वलय् पिहां वःगु खःसा उगु इलय् नेवाःतय् थासय् नेवाः हे गणक मवल धाःसा कन्हय् तथ्यांक गलत पिहां वये फइगु खँय् सचेत याःगु खः। अज्याःगु अवस्था जुल धाःसा जनगणना बहिष्कार याये माली धकाः तकं अन खँ पिहां वःगु खः ।
वयांलि मंकाः खलःया नेतृत्वय् सिडियोनिसें जनगणनाया प्रमुखतलिसे तकं सहलह यासें थौं सुथय् जूगु अन्तिम सहलहय् यलया नेवाःतय्गु लागाय् नेवाःत हे गणक छ्वया हयेगु सहमति जूगु खः। मंकाः खलः यलया नायः किरण शाक्यं कनादी कथं उकिया नितिं माःगु ब्यवस्था यायेगु खँ तथ्यांक विभागं धाःगु दु ।
