पुलांपिं आइजीपी सहित स्वीखुम्ह विरुद्ध मुद्दा दायर
अख्तियार दुरुपयोग अनुसन्धान आयोगं सुडान प्रकरणय् भ्रष्टाचार याःगु धासें स्वम्ह पुलांपिं आइजीपी (प्रहरी महानिरीक्षक) सहित स्वीखुम्ह विरुद्ध विशेष अदालतय् मुद्दा दायर याःगु दु ।
सुडान प्रकरणय् ताः ई लिपा अख्तियारं पुलांपिं आइजीपी ओमभक्त राणा, हेमबहादुर गुरुङ व रमेशचन्द ठकुरी विरुद्ध मुद्दा दायर याःगु खः । अथेहे बहालवाला एआइजीत मदन खड्का व अर्जुनगंगबहादुर शाहीनापं मेपिं स्वीछम्ह प्रहरी अधिकृत व ठेकेदारतय्त नं अख्तियारं अभियुक्त दयेकूगु दु ।
राष्ट्रसंघया आव्हानय् शान्ति अभियानय् सुडानय् खटे जुयाच्वंपिं नेपाल प्रहरीया निंतिं ५० करोडया ल्वाभः व उपकरण न्याःगु इलय् ३४ करोड घोटाला याःगु द्वपंलय् स्वीखुम्ह विरुद्ध मुद्दा दायर याःगु खः । अख्तियारं ताः ई न्ह्यः निसें सुडान प्रकरणय् छानबिन यानाच्वंगु खःसां राजनीतिक दबावया हुनिं मुद्दा दायर यायेमफयाच्वंगु खः ।
