ल्यँ दुपिं लडाकुत नं शिविर लिहांवन
एकीकृत नेकपा (माओवादी)या नेतातय् सुरक्षाय् खटे जुयाच्वंपिं ल्यँ दुपिं लडाकुत थौं शत्तिखोरस्थित लडाकु शिविरय् लिहांवंगु दु । माओवादी नायः पुष्पकमल दाहाल 'प्रचण्ड'या न्हू बजारय् च्वंगु छेँय् छगू ज्याझ्वःया दथुइ लडाकुतय्त बिदाई याःगु खः ।
प्रचण्डया सुरक्षाय् खटे जूपिं छगू पुचः लडाकुत आइतवाः हे लडाकु शिविर वंगु खःसा थौं माओवादी पदाधिकारी, स्थायी समिति व पोलिटब्यूरो नेतातय् सुरक्षाय् खटे जुयाच्वंपिं ६६म्ह लडाकुत ल्वाभः सहित लिहांवंगु खः ।
संविधानसभाया म्याद थप यायेगु निंतिं प्रमुख स्वंगू दलत दथुइ जूगु सहमति कार्यान्वयन यायेगु झ्वलय् माओवादीं दोहोरो सुरक्षा प्रणाली चीकूगु खः । निगू चरणय् यानाः लिहांवंपिं लडाकुत दकलय् न्हापां शक्तिखोरय् थ्यंकीगु व अन लिपा मेमेगू शिविरय् छ्वइगु जूगु दु । ल्वाभःत धाःसा शक्तिखोरय् हे तइगु धाःगु दु ।
माओवादी नेतातय् सुरक्षाया निंतिं नेपाःस्थित राष्ट्रसंघीय मिसन अनमिनं प्रमाणीकरण याःगु ९६पु ल्वाभः सहित सच्छि व खुम्ह लडाकुत खटे जुयाच्वंगु खः । दोहोरो प्रणाली अन्त्य जुइवं आः माओवादी नेतातय् सुरक्षाय् सशस्त्र व जनपथ प्रहरी खटे याःगु दु ।
