'महत्वपूर्ण नियुक्ति, बढुवा व सरुवा यायेमते'
नेपाली कांग्रेसं महत्वपूर्ण नियुक्ति, बढुवा व सरुवा मयायेत सरकारयात इनाप याःगु दु । कांग्रेसया नेतातय्सं थौं प्रधानमन्त्री झलनाथ खनालयात नापलाना नियुक्ति, बढुवा व सरुवा मयायेत सरकारया ध्यानाकर्षण याकूगु खः ।
कांग्रेस केन्द्रीय समितिं याःगु निर्णयया बारे ध्यानाकर्षण यायेत कांग्रेस नेतात थौं प्रधानमन्त्री निवास बालुवाटर थ्यंकूगु खः । कांग्रेस नेतातय्सं सरकार कामचलाउ जुइधुंकूगु धासें यदि महत्वपूर्ण नियुक्ति यायेगु ज्या याःसा कांग्रेसं सशक्त प्रतिकार यायेगु ख्याच्वः नं बिउगु खः ।
लिसलय् प्रधानमन्त्री खनालं छुं नं कथंया महत्वपूण व दुरागमी लिच्वः लाकीगु कथंया नियुक्ति, सरुवा वा बढुवा यायेगु सरकारया योजना मदुगु धयादिल । वय्कलं राजनीतिक दलत दथुइ सहमति जुइवं थः प्रधानमन्त्री पदं राजीनामा बीत तयार जूगु धयादिल ।
उगु इलय् शान्ति प्रक्रियाया, संविधान निर्माण व न्यागू बुँदे सहमतिया बारे नं खँल्हाबंला जूगु खः । कांग्रेसपाखें महामन्त्री प्रकाशमान सिंह, नेतात एनपी साउद व दिलेन्द्रप्रसाद बडु सुथय् प्रधानमन्त्री निवास थ्यंकूगु खः ।
News Location:
