'एमालें आः प्रधानमन्त्रीया निंतिं दावी याइमखु'
नेकपा (एमाले)या नेता प्रदीप ज्ञवालीं थःगु पार्टीं आः सरकारया नेतृत्वया निंतिं दावी मयाइगु खँ धयादीगु दु । 'संविधानसभा दतलय् एमालें आः सरकारया नेतृत्व दावी याइमखु', वय्कलं धयादिल ।
रिपोटर्स क्लबं थौं येँय् याःगु छगू साक्षात्कार ज्याझ्वलय् नेता ज्ञवालीं संविधानसभा दतलय् एमालें प्रधानमन्त्रीया निंतिं दावी मयाइगु धयादिसें माओवादी व कांग्रेसं सरकारया नेतृत्व यायेमाःगु धयादिल । वय्कलं निगू तःधंगु दलतय्सं 'आलोपालो'या सरकारया नेतृत्व यायेत नं सुझाव बियादिल ।
माओवादी प्रवक्ता दिनानाथ शर्मां आः गठन जुइगु सरकारय नेतृत्व स्वभाविक रुपं माओवादीया जूगु दावी यानादिसें माओवादीपाखें न्वकु डा. बाबुराम भट्टराई प्रधानमन्त्रीया उम्मेदवार जुइगु दावी यानादिल । वय्कलं माओवादी नेतृत्वय् राष्ट्रिय सहमतिय सरकार गठन यायेगु खँय् दलत दथुइ सहमति जुइवं माओवादीं भट्टराईया नां सर्वसम्मतं अनुमोदन याइगु धयादिल ।
माओवादी नायः पुष्पकमल दाहाल 'प्रचण्ड' शान्ति प्रक्रिया व संविधान निर्माणय् केन्द्रीत जुइगु दावी यानादिसें आःया न्हुगु सरकारया नेतृत्वया निंतिं पार्टी दुने व पिने फुक्कसियां मंकाः उम्मेदवार भट्टराई हे जूगु धयादिल ।
अथेहे ज्याझ्वलय् कांग्रेस नेता डा. नारायण खड्कां वर्तमान सरकार काम चलाउ जुइधुंकूगुलिं प्रधानमन्त्रीं तत्काल राजीनामा बीमाःगु धयादिल । वय्कलं प्रधानमन्त्री राजीनामा बियाः सहमतिय सरकारया निंतिं लँपु चायेकेमाःगु धयादिल ।
News Location:
