थीथी थासय् जूगु सतक दुर्घटनाय् न्हय्म्ह सित
सिन्धुली व चितवनय् जूगु निगू बिस्कं बिस्कं सतक दुर्घटनाय् लानाः न्हय्म्ह सिगु दुसाः पीनिम्ह घाःपा जूगु दु ।
सोमवाः सुथय् सिन्धुलीया सदरमुकामं चकमके धाःगु थासय् वनाच्वंगु ना. ३. ख. २६१३ नम्बरया यात्रुबहाक बस सिन्धुलीया रानीचुरी धाःगु थासय् सतकं क्वये कुनुवनाः दुर्घटना जूगु ख: । दुर्घटना जुयाः प्यम्ह सीगु खःसा नीच्याम्ह घाःपा जूगु खः । घाःपा जूपिंत वासः याकेगु निंतिं जिल्ला अस्पताल यंकूगु दुसाः गम्भीर घाःपाः जूपिंत धाःसा येँय् हःगु दु ।
उखे चितवनया खैरहनीइ छगः यात्रुबहाक बस व ट्रक ल्वानाः जूगु दुर्घटनाय् स्वम्ह सीगु दु । बा. २. ख. १५ नम्बरया बस व ना. २. ख. ३४३८ नम्बरया ट्रक ल्वानाः जूगु दुर्घटनाय् विरेन्द्रनगरया विपिन गुरुङ, कठार निवासी कालीबहादुर प्रजा व खैरहनीया राजकुमार चौधरी सीगु खः । चौधरी बसया चालक खः । अथेहे घटनाय् घाःपाः जूपिं झिंप्यम्हेसित वासः याकेगु निंतिं चितवन मेडिकल कजेल भरतपुरय् यंकूगु दु ।
