रामदेवया आपालं समर्थकतय्त प्रहरीं येँय् ज्वन
Posted on Mon Jun 6, 2011 1:33 pm NST
योग गुरु रामदेवया शान्तिपूर्ण अनसनय् भारतया प्रहरीं हस्तक्षेप याःगु विरोधय् नेपाःस्थित भारतया दूतावासय् ज्ञापनपत्र लःल्हाः वंपिंत प्रहरीं ज्वंगु दु ।
भारत थज्याःगु विश्वया हे दकलय् तःधंगु प्रजातान्त्रिक देशय् शान्तिपूर्ण ज्याझ्वलय् याःगु हस्तक्षेपया भर्त्सना यासें पतञ्जली योग समितिं सोमवाः ज्ञापनपत्र लःल्हात वंगु इलय् प्रहरीं इमित नियन्त्रणय् काःगु खः । भारतया दूतावासय् वने न्ह्यः लैनचौरया स्काउट मैदानय् मुनाच्वंगु इलय् प्रहरीं इमित अनं हे नियन्त्रणय् काःगु खः ।
प्रहरीं समितिया दुजःतय्त नियन्त्रणय् काःगुलिं ज्ञापनपत्र लःल्हायेगु ज्या धाःसा जुइमफुत । छुं ई लैनचोरया क्याटरिङ हलय् तयाः प्रहरीं इमित त्वःतुगु खः ।
News Location:
