नेतातय् सुरक्षार्थ खटे जुयाच्वंपिं लडाकुत लिहांवनेगु सुरु
एकीकृत नेकपा (माओवादी)या नेतातय् सुरक्षार्थ खटे जुयाच्वंपिं लडाकुत शक्तिखोरस्थित लडाकु शिविरय् लिहांवनेगु सुरु याःगु दु ।
संविधानसभाया म्याद थप याये न्ह्यः प्रमुख स्वंगू दलत दथुइ जूगु सहमति कथं माओवादीं लडाकुतय्त लितछ्वयेगु निर्णय याःगु खः । दाहोरो सुरक्षा प्रणाली त्याग यायेगु घोषणा लिपा थौं माओवादी नायः पुष्पकमल दाहाल 'प्रचण्ड'या सुरक्षाय् खटे जुयाच्वंपिं लडाकुत लिहांवंगु खः ।
प्रचण्ड निवास न्हू बजारय् छगू बिदाइ ज्याझ्वः यानाः माओवादी नायः प्रचण्डं लडाकुतय्त बिदाइ यानादीगु खः । वय्कलं थःगु सुरक्षाय् खटे जूपिंत सुभाय् बियादिसें लडाकुतय् सफलताया कमना यानादिल । प्रचण्डया सुरक्षार्थ सतौं डिभिजन कमाण्डर सन्तु दारईया नेतृत्वय् न्यय्म्ह स्वयां अप्व लडाकुत खटे जुयाच्वंगु खः ।
शान्ति सम्झौता लिपा नेपाःस्थित राष्ट्रसंघीय मिसन अनमिनं प्रमाणीकरण याःगु गुइखुपु ल्वाभः सहित सच्छि व झिंनिम्ह लडाकुत माओवादी नेतातय् सुरक्षार्थ खटे जुयाच्वंगु खः । लडाकु प्रमुख नन्दकिशोर पुन 'पासाङं' माओवादी पदाधिकारी, स्थायी समिति व पोलिटब्यूरो नेतताय् सुरक्षाय् खटे जूपिं लडाकुत छवाया दुने ल्वाभः सहित लडाकु शिविर लिहांवइगु जानकारी ब्यूगु दु ।
