थौं विश्व वातावरण दिवस
थौ जुन ५ अर्थात विश्व वातावरण दिवस । 'बन प्रकृतिया उपहार, जीवनया आधार' धइगु मू नारा सहित थुगुसीया वातावरण दिवस नेपाः लगायत हलिंन्यंक हनाच्वंगु दु । वातावरण दिवसया लसताय् पर्यावरणीय सुरक्षाय् ज्या यानाच्वंगु संघ संस्थातय्सं थौं सुथय् छगू र्याली पिथन । वातावरण संरक्षण सम्बन्धी थीथी सन्देशमूलक व जनचेतनामूलक प्ले कार्ड सहित उगु र्याली येँया थीथी लागा चाहिउगु खः ।
सन् १९७२य् संयुत्त राष्ट्र संघया मानव वातावरण सम्बन्धी सम्मलेन सुरु जूगु न्हियात लुमंकाः संयुक्त राष्ट्र संघं सन् १९७३ निसें जुन ५ तारिखयात विश्व वातावरण दिवस कथं हनेगु यानाच्वंगु दु । थुगु न्हि विशेष यानाः वातावरण सम्बन्धी जनचेतना व पर्यावरणीय सुरक्षाय् ज्या यानाच्वंपिं संघ संस्थातय् कुतः प्रति सरकार व राजनीतिक नेतृत्वया ध्यानाकर्षण यायेगु कथं हलिंन्यंक ज्याझ्वः यानाः हनीगु चलन दु ।
