सहमति कार्यान्वयन बारे माओवादी-एमाले सहलह
प्रमुख स्वंगू दलत दथुइ जूगु न्यागू बुँदे सहमति कार्यान्वयन यायेगु विषयलय् सत्तारुढ नेकपा (एमाले) व एकीकृत नेकपा (माओवादी) दथुइ खँल्हाबंला जूगु दु ।
बालुवाटारस्थित प्रधानमन्त्री निवासय् शनिवा: जूगु खँल्हाबंलाय् न्यागू बुँदे कार्यान्वयन यानाः राष्ट्रिय सहमतिय सरकारया निर्माण बारे सहलह जूगु खः । राष्ट्रिय सहमतिय सरकार निर्माण यायेत माओवादी नेतातय्सं प्रधानमन्त्रीयात पहल यायेत इनाप याःगु खः ।
उगु इलय् एमाले नेतातय्सं पार्टी केन्द्रीय कमिटीं प्रस्ताव याःगु शान्ति प्रक्रिया व राष्ट्रिय सहमतिय सरकार गठनया बारे माओवादीयात जानकारी बिउगु खः । एमाले केन्द्रीय कमिटीं असार १५ गते दुने माओवादी नेतृत्वय् राष्ट्रिय सरकार गठन यायेगु प्रस्ताव न्ह्यब्वःगु खः ।
अथेहे निगू दलया नेतात दथुइ शान्ति प्रक्रियायात क्वचायेगु मार्गचित्रया बारे थःथः दलया प्रस्तावया बारे नं सहलह जूगु खः ।
निगू दल दथुइया खँल्हाबंलाय् एमालेपाखें प्रधानमन्त्री झलनाथ खनाल, प्रधानमन्त्रीया राजनीतिक सल्लाहकार प्रकाश ज्वाला, सुरेन्द्र पाण्डे व घनश्याम भूसालया ब्वति दुगु खः । अथेहे माओवादीपाखें नायः पुष्पकमल दाहाल 'प्रचण्ड', न्वकूत मोहन वैद्य 'किरण' व डा. बाबुराम भट्टराई, मूछ्याञ्जे रामबहादुर थापा 'बादल' व नेता वर्षमान पुन 'अनन्त'या ब्वति दुगु खः ।
News Location:
