कटवालयात अनुसन्धान यायेत राष्ट्रसंघीया मानवअधिकार समितिया निर्देशन
संयुक्त राष्ट्रसंघीय मानवअधिकार समितिं न्हय्दँ न्ह्यः नेपालय् जूगु गैरकानुनी थुनाय् पुलाम्ह प्रधानसेनापति रुकमाङ्ग कटवालयात नं अनुसन्धान यायेत सरकारयात निर्देशन बिउगु दु ।
न्हय्दँ न्ह्यः युवराज गिरीयात सेनां गैरकानुनी थुनाय् तयाः यातना बिउगु विषययात कयाः लाःगु उजुरीया फैसला यासें समितिं घटनाया दोषीतय्गु बारे अनुसन्धान यायेत निर्देशन बिउगु खः । २०६१ साल वैशाख १७ गते बाँकेया गिरीयात कुनाः यातना बिउगु इलय् कटवाल तत्कालीन शाही सेनाया मध्यपश्चिम पृतनापति जुयाच्वंगु खः ।
समितिं नागरिक व राजनीतिक अधिकारसम्बन्धी अन्तर्राष्ट्रिय प्रतिज्ञापत्र (आइसिसिपिआर) अन्तर्गतया सन्धि दायित्व नेपालं हानं उल्लघन याःगु न्ह्यथंसें अनुसन्धान लिपा गिरीयात यतना बिउगु खँय् कटवाल जिम्मेवार जूसाः १८० न्हिया दुने कारवाही यायेत आदेश बिउगु दु ।
संयुक्त राष्ट्रसंघीय मानवअधिकार समितिं गिरीया मुद्दाय् आइसिसिपिआरया धारा २.३ (प्रभावकारी उपचारया हक), धारा ७ (यातना विरूद्धया हक), ९.१ (व्यक्तिया स्वतन्त्रता व सुरक्षाया हक) तथा १०.१ (मानव व्यक्तिया अन्तर्निहित गरिमाया सम्मान)या उल्लंघन जूगु ठहर या:गु दु ।
झिंस्वला सेनाया इमामनगरस्थित सैनिक ब्यारेकय् कोठरीइ व सच्छि व नीखुन्हु बाँकेया कारागारय् गैरकानुनी तरिकां कुनातःगुलिं वय्कःया छेँजःपिंत तकं मानसिक लिच्वः लाःगुलिं उकिया क्षतिपूर्ति नं बीत समितिं निर्देशन बिउगु दु ।
फौसलाया बारे एड्भोकेसी नेपालं थौ छगू पत्रकारा सम्मेलन यानाः जानकारी बिउगु खः । नेपालय् थःगु मुद्दाया सुनुवाई मजूगु धासें गिरीं वंगु २०६४साल पुस ३० गते एड्भोकेसी फोरमय् कानुनी ग्वाहालिया निंतिं उजुरी दर्ता याःगु खः । नेपालं सन् १९९९य् यातना विरुद्धया महासन्धि अनुमोदन याःगु खः ।
