सहमति कार्यान्वयनया निंतिं कांग्रेसं वार्तायात तीव्रता बीगु
संविधानसभाया इलय् प्रमुख स्वंगू दलत दथुइ जूगु स्वंगू बुँदे सहमति कार्यान्वयन यायेगु निंतिं नेपाली कांग्रेसं राजनीतिक वार्तायात तीव्रता बीगु निर्णय याःगु दु ।
येँया सानेपास्थित कांग्रेस मू ज्याकूथी बिहीवाः च्वंगु पार्टी केन्द्रीय कार्यसमितिया मुँज्यां न्यागू बुँदे सहमतियात अनुमोदन यासें सहमति कार्यान्वयन यायेत अविलम्ब वार्ता प्रारम्भ यायेगु निर्णय याःगु खः । कांग्रेसं न्यागू बुँदे सहमति कार्यान्वयन यानाः राष्ट्रिय सहमति दयेकेत पार्टीं अग्रसरता कायेगु खँ क्वःछिउगु खः ।
बुधवाः निसें न्ह्याःगु कांग्रेस केन्द्रीय मुँज्याय् केन्द्रीय दुजःतय्सं न्यागू बुँदे सहमतिया इलय् कांग्रेसं न्ह्यब्वःगु झिगू बुँदे सर्त त्वःतुगु धासें नेतृत्वया कुंखिंगु खः । पार्टी दुने न्यागू बुँदे विवाद जूसां केन्द्रीय समितिं उकियात अनुमोदन याःगु खः ।
अथेहे कांग्रेस नेतातय्सं न्यागू बुँदाय् न्ह्यथनातःगु प्रधानमन्त्रीया राजीनामा बारे दकलय् न्हापां सहमति जुइमाःगु बिचाः प्वंकूगु दु । राष्ट्रिय सहमतिय सरकारया लकस तयार जुइधुंकाः जक प्रधानमन्त्रीं राजीनामा बीमाःगु पक्षय् आपालं नेतातय्सं थःगु खँ तःगु खः ।
News Location:
