सहमतिया न्यूनतम आधार तयार जुइकाः जक प्रमया राजीनामा : एमाले
नेकपा (एमालें) राष्ट्रिय सहमतिय सरकार निर्माणया न्यूनतम आधार तयार जुइकाः जक प्रधानमन्त्री झलनाथ खनालं थःगु पदपाखें राजीनामा यायेगु निर्णय याःगु दु ।
निन्हु न्ह्यः निसें पार्टी मुख्यालय मदननगर बल्खुइ न्ह्यानाच्वंगु पार्टी केन्द्रीय मुँज्यां सहमतिया आधार तयार जुइवं प्रधानमन्त्रीं राजीनामा यानाः मार्ग प्रशसत यायेगु खँय् विवाद मदुगु खँ धाःगु दु । एमालें न्यागू बुँदाय् न्ह्यथनातःगु प्रधानमन्त्रीया राजीनमाया विषययात व्यवस्थापिका संसदं नं अनुमोदन यायेधुंकूगुलिं आः थुकियात विवाद मदयेकूसें फुक्कसित शान्ति प्रक्रियाय् केन्द्रीत जुइत इनाप याःगु दु ।
अथेहे बिहीवाः च्वंगु मुँज्यां छवाःया दुने माओवादी लडाकुया समायोजन, पुनःस्थापना, मोडालिटी आदि विषयलय् सहमति यानाः शान्ति प्रक्रियाया निंतिं सहमतिया आधार तयार यायेमाःगु प्रस्ताव न्ह्यने हःगु दु ।
एमालें छवाःया दुने थज्याःगु विषयलय् कार्यातालिका दयेकेफुसाः सहमतिया वातावरण निर्माण जुइगु ठहर याःगु खः । एमालेया प्रस्तावय् छवाःया दुने माओवादी लडाकुया समायोजन व पुनःस्थापनानाप सम्बन्धित ल्याः, मापदण्ड, दर्जा मिलान व समायोजन लिपाया संरचना थज्याःगु विवादित मुद्दा क्वचायेकेगु, पुनःस्थापना व स्वेच्छिक विदाइया निंतिं सम्मानजनक प्याकेज तयार यायेगु, दोहोरो सुरक्षा प्रणालीया व्यवहारिक अन्त्य यायेगु व लडाकु वर्गीकरणया ज्या सुरु यायेगु खँ न्ह्यथनातःगु दु ।
News Location:
