प्रधानमन्त्री खनालपाखें प्रचण्ड व कोइरालानाप खँल्हाबंला
प्रधानमन्त्री झलनाथ खनालं संविधानसभाया म्याद थप यायेत स्वंगू प्रमुख दलत दथुइ जूगु न्यागू बुँदे सहमतिया विषयलय् एनेकपा (माओवादी)या नायः पुष्पकमल दाहाल 'प्रचण्ड' व नेपाली कांग्रेसया सभापति सुशील कोइराला नाप बिस्कं बिस्कं सहलह यानादीगु दु ।
बालुवाटारस्थित प्रधानमन्त्री निवासय् माओवादी नायः प्रचण्डनाप जूगु खँल्हाबंलाय् निम्ह नेतात दथुइ न्यागू बुँदे सहमति बारे वयाच्वंगु थीथी बिचाःयात एकरुपता बियाः कार्यान्वयन यायेगु बारे सहलह जूगु खः । 'निम्ह नेतात दथुइ न्यागू बुँदे सहमतियात कार्यान्वयन यायेगु विषयलय् सहलह जुल', प्रधानमन्त्रीया प्रेस सल्लाहकार सूर्य थापां धयादिल ।
प्रचण्डयात नापलायेवं प्रधानमन्त्री खनालं कोइराला निवास महाराजगञ्ज थ्यंकाः कांग्रेस सभापतिनाप खँल्हाबंला यानादीगु खः । उगु इलय् कोइरालां न्यागू बुँदे सहमति कार्यान्वयन यायेत गम्भीर जुइत इनाप याःगु खः । लिसलय् प्रधानमन्त्री खनालं सहमति कार्यान्वयन यायेगु लकस दयेकेत इनाप यासें थः न्यागू बुँदा कार्यान्वयन यायेत तयार जूगु धयादिल ।
निम्ह नेतात दथुइ शान्ति प्रक्रिया व संविधान निर्माणया झ्वलय् खनेदुगु विवाद ज्यंकेगु बारे नं सहलह जूगु खः । न्यागू बुँदे सहमति लिपा प्रधानमन्त्री खनालं कांग्रेस सभापति कोइरालायात नापलानादीगु खँ न्हापांगु खुसिइ खः ।
