राष्ट्रिय सहमतिय सरकारया प्रम भट्टराई : पौडेल
एनेकपा (माओवादी)या पोलिटब्यूरो दुजः देवेन्द्र पौडेलं माओवादी न्वकू डा. बाबुराम भट्टराईं आः गठन जुइगु राष्ट्रिय सहमतिय सरकारया नेतृत्व याइगु दाबी यानादीगु दु । 'भट्टराईया नेतृत्वय् सहमति जुइगु निश्चित जुइधुंकल, आः घोषणा जक जुइ ल्यँ दनी', वय्कलं धयादिल ।
रिपोटर्स क्लबं बुधवाः येँय् याःगु साक्षात्कार ज्याझ्वलय् नेता पौडेलं पार्टी दुने भट्टराईयात प्रधानमन्त्री दयेकेगु न्हापा हे सहमति जुइधुंकूगु धयादिल । राष्ट्रिय सहमतिय सरकारय् सहमति जुइफुम्ह नेता भट्टराई जक जूगु दावी यानादिसें वय्कलं भट्टराईया विकल्प मदुगु स्पष्ट यानादिल ।
उगु हे ज्याझ्वलय् कांग्रेस नेता डा. रामशरण महतं धाःसा आः कांग्रेसया नेतृत्वय् राष्ट्रिय सहमतिय सरकार गठन जुइगु दाबी यानादिल । वय्कलं माओवादी नेतातय्सं हे कांग्रेसया नेतृत्वय् सरकार गठन जूसाः शान्ति प्रक्रिया क्वचायेकेत अपुइगु सुझाव बिउगु नं धयादिल ।
नेता महतं एमालेया पाः वनेधुंकूगु व माओवादीं निश्चित सर्त पूमवंकं सरकारया नेतृत्व यायेमफइगु धयादिसें कांग्रेसया नेतृत्वय् सरकार गठन जुइगु पक्का जूगु धयादिल ।
News Location:
