विवाद समाधान यायेत नीस्वंगु उपसमितिया म्याद थप
संवैधानिक समिति अन्तर्गत विवाद समाधान यायेत नीस्वंगु उपसमितिया म्याद हानं थप याःगु दु ।
सिंहदरवारय् बुधवाः च्वंगु संवैधानिक समितिया मुँज्यां उपसमितिया म्याद प्यक्वःगु खुसिइ थप यायेगु निर्णय याःगु खः । सभामुख सुभाषचन्द्र नेम्वाङं म्हिग आव्हान यानादीगु प्रमुख नेतातय् अनौपचारिक मुँज्यां उपसमितिया म्याद थप यायेगु सहमति लिपा थौं उकिया बारे संवैधानिक समितिं औपचारिक निर्णय याःगु खः । थौं थप याःगु उपसमितिया म्याद समयसिमा क्वःमछिउसें याःगु खः ।
माओवादी नायः पुष्पकमल दाहाल 'प्रचण्ड'या संयोजकत्वय् दुगु उपसमितिया म्याद वंगु जेठ १३ गते क्वचाःगु खः । उगु समितिं निसः स्वयां अप्व विवादित विषयलय् सहलह यानाः आपालं विषयलय् सहमति याःगु खः । आः मुक्कं नीछगू विषयलय् जक सहमति जुइ ल्यँ दनी ।
उपसमितिं न्हू संविधान निर्माणया झ्वलय् महत्वपूर्ण भूमिका म्हितूगु धासें संवैधानिक समितिया थौं च्वंगु मुँज्यां हानं म्याद थप यायेगु निर्णय याःगु खः । विवाद समाधान यायेगु प्रक्रिया तीव्र यायेत आः उपसमितिं हरेक झिन्हुया छक्व प्रगति विवरण संवैधानिक समितियात लःल्हायेमाःगु व्यवस्था याःगु दु ।
News Location:
