ओलीयात अनुशासनया कारवाही यायेत माग
मंगलवाः निसें सुरु जूगु नेकपा (एमाले)या केन्द्रीय कमिटीया मुँज्याय् पार्टीया प्रभावशाली नेता केपी शर्मा ओलीयात अनुशासनया कारवाही यायेत माग यासें प्रस्ताव पेश जूगु दु ।
प्रधानमन्त्री झलनाथ खनाल पक्षया नेता सुरेन्द्र पाण्डें अनुशासनया कारवाहीया माग यासें ओली विरुद्ध झिंछगू बुँदे प्रस्ताव पेश यानादीगु खः । वय्कलं पेश यानादीगु झिंछगू बुँदे प्रस्तावय् नेता ओलीं पार्टी नेतृत्व विरुद्ध समानान्तर गतिविधि संचालन याःगु, महाधिवेशनया फौसला विरुद्ध केन्द्रीय कमिटी व सरकारया ज्याय् पंग थंगु, अदृष्य थासं आर्थिक स्रोत हयाः गुटवनन्दी याःगु आदि द्वपं बियातःगु दु ।
संविधनसभाया म्याद थप याये न्ह्यः च्वंगु केन्द्रीय कमिटीया मुँज्याय् नेता ओलीं प्रधानमन्त्री नापं पार्टी नायः खनाल विरुद्ध थीथी द्वपं बियाः गुंगू बुँदे प्रस्ताव पेश यायेवं खनाल पक्षधर नेतातय्सं नं ओली विरुद्ध मेगू प्रस्ताव पेश याःगु खः ।
नेता पाण्डें ओली विरुद्ध पेश यानादीगु प्रस्ताव सहलहया निंतिं धासें पार्टी मूछ्याञ्जे इश्वर पोखरेलयात लःल्हाःगु दु । उगु प्रस्तावय् ओली जनआन्दोलन विरुद्ध सःथ्वयेकूम्ह नेता जूगु, गणतन्त्र विरुद्ध राजतन्त्रया पक्षय् वकालत याःगु, पार्टी दुने गुण्डा संस्कृतियात बढावा बिउगु, राष्ट्रिय, राष्ट्रिय एकता व राष्ट्रिय हितया विरुद्ध अदृश्य शत्तिनाप साँठगाँठ यानाः शंकास्पद गतिविधि याःगु थज्याःगु द्वपं बियातःगु दु ।
News Location:
