सहमतिय सरकारया निंतिं लँपु प्रसस्त यायेत आतुर : प्रम
प्रधानमन्त्री झलनाथ खनालं सहमतिय सरकारया निंतिं लँपु प्रसस्त यायेत थः आतुर जूगु खँ धयादीगु दु । वय्कलं राष्ट्रिय सहमति जूसाः तत्काल प्रधानमन्त्री पदं राजीनामा बियाः ग्वाहालि यायेगु धयादिल ।
संविधानसभाया म्याद थपया निंतिं प्रमुख स्वंगू दल दथुइ जूगु न्यागू बुँदे सहमति लिपा न्हापांगु खुसिइ मंगलावाः राष्ट्रया नांमय् सम्बोधन यानादिसें प्रधानमन्त्री खनालं थः सहमतिया सरकारयात निंतिं बाधक मजुइगु स्पष्ट यानादिल । वय्कलं सहमतिया निंतिं जिम्मेवार जुइत प्रतिपक्षी नापं फुक्कसितं इनाप तकं यानादिल ।
संविधानसभाया विकल्प मदुगु धयादिसें प्रधानमन्त्री खनालं हानं म्याद थप यायेमाःगुलिं आत्लोचना यानादिल । वय्कलं संविधानसभा पाखें हे संविधान जारी यायेमाःगु बिचाः नं प्वंकादिल । माओवादीं शान्ति प्रक्रियाय् प्रतिबद्धता प्वंकेत लिबाकूगु व कांग्रेसं जागरण अभियानय् थःगु ध्यान केन्द्रीत याःगुलं संविधान निर्माणय् बाधा जूगु वय्कलं धयादिल ।
सम्बोधन मार्फत वय्कलं सहमतिय सरकार निर्माण लगायतया विषय दुथ्याकातःगु न्यागू बुँदे सहमति कार्यान्वयन यायेत लिबाकेमज्यूगु खँ बः बियादिल ।
News Location:
