प्रमया राजीनामा याकेगु सहमति पार्टी निर्णय विपरित : गजुरेल
एकीकृत नेकपा (माओवादी)या छ्याञ्जे सीपी गजुरेलं न्यागू बुँदे सहमतिइ दुथ्याकातःगु प्रधानमन्त्री झलनाथ खनालया राजीनामा पार्टी निर्णय विपरित जूगु तर्क यानादीगु दु । पार्टी नायः प्रचण्डं पार्टी निर्णय अःख सहमति यानाः ल्हाःचिं तयादीगुलिं वय्कःया निर्णय बारे पार्टी दुने गम्भीर सहलह जुइगु धयादिल ।
रिपाटर्स क्लबं थौं येँय् याःगु छगू साक्षात्कार ज्याझ्वलय् नेता गजुरेलं वर्तमान खनाल नेतृत्वया सरकारयात हे राष्ट्रिय सहमतिया सरकार दयेकेगु निर्णय पार्टीं याःगु धयादिसें थःपिंसं हे दयेकूगु सरकारया राजीनाम मफ्वनीगु स्पष्ट यानादिल । वय्कलं थ्वहे सरकारयात राष्ट्रिय सहमतिया सरकार दयेकेमाःगु खँय् नं बः बियादिल ।
राजनीतिक दलत दथुइ सहमति जूसाः जक प्रधानमन्त्री खनालं राजीनामा बीमाःगु धयादिसें नेता गजुरेलं आः हे राजीनामा ब्यूसाः परिस्थिति झन स्यनीगु ख्याच्वः बियादिल ।
अथेहे ज्याझ्वलय् कांग्रेस नेता गोपालमान श्रेष्ठ व एमाले नेता नापं सिंचाई मन्त्री रघुवीर महासेठं प्रधानमन्त्री खनालं आः हे राजीनामा बीम्वाःगु धयादिसें न्हूम्ह प्रधानमन्त्री सु जुइगु धकाः सहमति जुइधुंकाः जक राजीनमा वयेमाःगु बिचाः तःगु खः ।
ल्वाभः हे मदुगु नागरिकयात छाय् समायोजन?
उगु हे साक्षात्कार ज्याझ्वलय् माओवादी छ्याञ्जें सेना समायोजन व ल्वाभः लःल्हायेगु ज्या नाप नापं यंकेमाःगु धयादिल । वय्कलं न्हापा हे ल्वाभः लःल्हायेधुंकाः समायोजन लिपा यायेगु बिचाः उचित मजूगु धयादिसें ल्वाभः हे मदुगु नागरिकयात छाय् व छुकि समायोजन यायेमाःगु धकाः न्ह्यसः तयादिल ।
News Location:
