विवाद समाधान समितिया म्याद हानं थप याइगु
प्रमुख राजनीतिक दलया नेतातय्सं संवैधानिक समिति अन्तर्गत विवाद समाधान यायेत नीस्वंगु उपसमितिया म्याद हान थप यायेगु निर्णय याःगु दु । सभामुख सुभाषचन्द्र नेम्वाङं थौं आव्हान यानादीगु अनौपाचिरक मुँज्यां उपसमितिया म्याद थप यायेगु निर्णय याःगु खः । आः कन्हय् च्वनीगु संवैधानिक समितिया मुँज्यां म्याद थपया विषयया औपचारिक निर्णय याइ ।
प्रधानमन्त्री झलनाथ खनाल, उपसभामुख पूर्णकुमारी सुवेदी, संवैधानिक समितिया सभापति निलाम्बर आचार्य, माओवादी नयाः पुष्पकमल दाहाल प्रचण्ड, कांगेस संसदीय दलया नेता रामचन्द्र पौडेल लगायत नेतात दुथ्यागु थौंया मुँज्या न्यागू बुँदे सहमति कार्यान्वयन, संविधानया न्हापांगु मस्यौदा स्वलाया दुने तयार यायेगु व शान्ति प्रक्रिया क्वचायेकेगु बारे केन्द्रीत जूगु खः ।
संविधानसभाया म्याद स्वलाया निंतिं थप जुइवं संविधान निर्माण प्रक्रियायत तीव्रता बीत सभामुख नेम्वाङं थौंया मुँज्या आव्हान यानादीगु खः ।
