म्ये च्वमि तृषित मन्त

वरिष्ठ म्ये च्वमि राममान तृष्ति थौं सुथय् ७०दँया वैशंय् मन्त । जल स्येँया ल्वचं कयाच्वम्ह तृषित चाबहिलीस्थित मेडिकेयर अस्पतालय् वासः याकाच्वंगु इलय् मदुगु खः । वय्कलं आपालं सदावहार म्ये नापं चिनाखँ, निबन्ध नं च्वयादीगु दु । वय्कः च्वमि नापं छम्ह चिकित्सक व कुशल चित्रकार नं खः ।

वय्कःया थौं हे पशुपति आर्यघाटय् अन्तिम संस्कार जूगु दु । वस्वयां वय्कःया सीम्ह अन्तिम श्रद्धाञ्जलीया निंतिं कमलादीस्थित नेपाल प्रज्ञा भवनय् तयातःगु खः । प्रधानमन्त्री झलनाथ खनाल नापं सांगीतिक ख्यःया आपालं व्यक्तित्वत प्रज्ञा भवन थ्यंकाः वय्कः प्रति अन्तिम श्रद्धाञ्जली देछागु खः । चाबहीलीया मैजुबहालय् च्वनाच्वनादीम्ह तृष्तिया जाहन व छम्ह काय् दी ।