माओवादीयात लिट्टे व जीत प्रभाकरण देयेकेगु कुतः जुयाच्वंगु दु : प्रचण्ड
प्रधानमन्त्री पुष्पकमल दाहाल प्रचण्डं प्रधानसेनापतिया कारवाही यायेगु निर्णय विदेशी प्रभुतय् इशाराय् दलतय्सं अस्वीकृत याःगु खँ धयादीगु दु ।
आइतवाः येँय् माओवादीं याःगु जनसभायात सम्बोधन यासें वयेकलं माधव नेपाल विदेशीया रिमोट कन्ट्रोलय् प्रधानमन्त्री जुइत्यंगु द्वपं बियादिल । माधव नेपालयात नापलावलय् थम्ह धाःगु खँ लुमंकूसें वयेकलं धयादिल, - 'छित प्रधानमन्त्री हे माःगु खसाः झीसं दयेकाबी, छाय् विदेशीया रिमोट कन्ट्रोलय् जुइमाल ?'
प्रधानमन्त्री प्रचण्डं माओवादीयात सिधेकेत देशी-विदेशी प्रतिक्रियावादीत लगे जुयाच्वंसां उकीया प्रतिकार यायेत नेपाली जनता तयार जूगु धयादिल । वयेकलं दक्व शक्ति मिलेजुयाः माओवादीयात लिट्टे व थःयात प्रभाकरण देयेकेगु कुतः जुयाच्वंगु धयादिल । मेगू दलत सैनिक सर्वोच्चता कायम यायेत लगेजुयाच्वंगु धासें थिपं नागरिक सर्वोच्चत कायम यायेत सरकार त्वताः सतकय् वयागु धयादिल ।
