ह्याउँख्वाः माजुया कलेवर हिलेगु ज्या न्ह्यात

सक्व (सन्ध्या टाइम्स)/ सक्वःया उग्र तारा खड्गयोगीनी (ह्याउँख्वाः माजु) द्यःया झिंनिदँय् छक्वः कलेबर हिलेगु धकाः चाया न्हूम्ह द्यः दयेकाः पलिस्था यायेगु चलन कथं थुगुसी न्हूम्ह द्यः दयेकेगु ज्या न्ह्याःगु दु। अन न्हापांनिसें दुपिं द्यःत स्यनीगु व रुप बांमलाना वनीगु कारणं उकियात झिंनिदँय् छक्वः हानं पूर्ण रुपं मेगु हे द्यः दयेकाः पलिस्था यायेगु चलन दु ।

झिंनिदँया छक्वः बुंगद्यःया रथया मुक्कं सिँ हिलाः बुंगय् हे रथ दयेकी थें थन च्वंपिं फुक्कं द्यःत न्हूगु दयेकीगु खः। थ्व ज्या थुगुसी वंगु बैशाख २२ गते अक्षय तृतीयाया सातिनिसें न्ह्यात। परम्परागत रुपं चा फ्याना चाया द्यः दयेकाः पलिस्था यायेगु ज्या येँया मञ्जुश्रीनक महाविहार (ओमबहाः) न्हूछेँ कवःया शाक्य नेवाः खलःपिंसं याना वयाच्वंगु खः। थुगुसी अन कलेबर हिलेगु ज्याय् मञ्जुश्रीनक महाविहारया वरिष्ठ कलाकारपिंसं यानाच्वंगु दु। कलाकार बाबुकृष्ण शाक्यया नेतृत्वय् वंगु उगु पुचलय् प्रेमकृष्ण शाक्य, धर्मरत्न शाक्य, सुनिलरत्न शाक्य व ज्योतिरत्न शाक्यपिंसं द्यः दयेकेगु ज्या यानाच्वंगु दु। बाःछि नीन्हुया दुने थुगु थासय् च्वंपिं फुक्कं द्यःया मूर्ति तयार यायेधुंकाः प्राण पलिस्था यानाः जक अन मेपिंत पूजा याके बी ।

वंगु जेठ १४ गते द्यः दयेकीपिं कलाकारतय् हापुजा (ल्हा पुजा) यानाः अन द्यः दयेकेगु ज्या न्ह्याकूगु खः। द्यः दयेकेगु ज्या क्वचायेके धुंकाः लंपुं छायेगु (रंग पायेगु) क्वचायेकाः द्यइके प्राण प्रतिष्ठा पुजा यानाः जक भक्तजनपिंत दर्शनया लागिं खुल्ला याइ। थुगु ज्या न्हापा साँखु बज्रयोगिनी सुधार समितिपाखें याना वयाच्वंगु खः। लुमंकेबहः जू वय्कः कलाकारपिंसं फंपिया बज्रायोगिनी, येँया भिंद्यःत्वाःया भिंद्यः व विजेश्वरी नं परम्परागत रुपं न्हूगु द्यः दयेकाः पलिस्था याना वयाच्वंगु दु ।