सर्वोच्चं सापकोटायात मन्त्री नियुक्त यायेमाःगु कारण माग

सर्वोच्च अदालतं फौजदारी अभियोग लाःम्ह माओवादी नेता अग्नीप्रसाद सापकोटायात मन्त्री नियुक्त यायेमाःगु कारण माग याःगु दु । सर्वोच्चया प्रधानन्यायधीश खिलराज रेग्मीया एकल इजलासं सोमवाः सरकारनाप लिखित जवाफ फ्वंगु ख: ।

फौजदारी अभियोग लाःम्ह मन्त्री सापकोटाया पद खारेजी यायेमाःगु माग सहित वंगु जेठ १३गते डा. गोपालकृष्ण शिवाकोटी, कनकमणि दिक्षित, सुबोधराज प्याकुरेल, चरण प्रसाई लगायतं रिट दायर याःगु खः । उगु रिटय् प्रधानमन्त्री झलनाथ खनाल व गृहमन्त्री कृष्णबहादुर महरायात विपक्षी दयेकातःगु ख: ।

मन्त्री सापकोटायात २०६२ साल बैशाख १६ गते काभ्रेया छत्रेबाँझस्थित कृष्ण माध्यमिक विद्यालयं अर्जुन लामायात अपहरण यानाः हत्या याःगु अभियोग लगे जुयाच्वंगु दु ।