थीथी जातीय संगठनतय्सं न्यागू बुँदे सहमति च्याकल
थीथी न्यागू जातीय संगठनतय्सं संविधानसभाया म्याद थपया निंतिं प्रमुख स्वंगू दलत दथुइ जूगु न्यागू बुँदे सहमति च्याकूगु दु । संविधानसभाया वैधानिकता क्वचायेधुंकूगु धासें इमिसं न्यागू बुँदे सहमति च्याकूगु खः ।
थरुहट स्वायत्त राज्य परिषद, संघीय लिम्बुवान राज्य परिषद, संघीय लोकतान्त्रिक राष्ट्रिय पार्टी, आदिवासी जनजाति अधिकार मञ्च व ताम्सालिङ स्वायत्त राज्य परिषदं सोमवाः छगू पत्रकार सम्मेलन यानाः पत्रकारतय् न्ह्यने न्यागू बुँदे सहमति च्याकूगु खः ।
न्यागू बुँदे सहमतिइ मधेशया खँ जक न्ह्यथनाः आदिवासी जनजाति, मुस्लिम, दलित लगायत समुदाय नाप जूगु सहमतिया बेवास्ता याःगु द्वपं नं बिउगु दु । इमिसं संविधानसभा विघटन यानाः सर्वजातीय संयुक्त राष्ट्रिय सरकार गठन यायेमाःगु व न्हूगु संविधानसभाया निर्वाचन यायेमा:गु माग नं इमिसं याःगु दु ।
अथेहे न्यागू जातीय संगठनतय्सं थःपिंसं हे न्हूगु संविधान जारी यानाः थःथःगु लागाय् कर कायेगु व विकास निर्माणया ज्या यायेगु ख्याच्वं तकं बिउगु दु ।
