माओवादीया प्रस्ताव देउवा, कांग्रेसया प्रस्ताव बादल
येँ (सन्ध्या टाइम्स)/राष्ट्रिय सहमतिया सरकारया नितिं एकीकृत माओवादी व नेपाली कांग्रेसया शीर्ष नेतातय्सं थःथःगु पार्टीया नेतायात प्रधानमन्त्री दयेकेगु धकाः मधासे मेपिनिगु पार्टीया नेतात ल्ययाः थःपिंसं प्रस्ताव यायेगु ज्या म्हिगः बहनी बैठकय् जूगु दु ।
संविधानसभाया म्याद थप यायेगु नितिं जूगु बैठकय् राष्ट्रिय सहमतिया सरकारया नितिं एकीकृत माओवादीं नेपाली कांग्रेसया नेता शेरबहादुर देउवायात प्रधानमन्त्रीया रुपय् प्रस्ताव याःगु खःसां उकियात कांग्रेस सभापति सुशील कोइराला, रामचन्द्र पौडेल नापं मेमेपिंसं अस्वीकार यानादीगु खः। अथे हे कांग्रेसया नेतातय्सं नं राष्ट्रिय सहमतिया सरकारया नितिं माओवादीपाखें रामबहादुर थापा बादलयात प्रधानमन्त्री दयेकेगु प्रस्ताव याःगु खःसा उकियात नं माओवादीया नेतातय्सं अस्वीकार याःगु खः ।
माओवादीया अध्यक्ष प्रचण्डयात नेपाली कांग्रेसं अस्वीकार याःगु अले कांग्रेसया नेता रामचन्द्र पौडेलयात माओवादीं अस्वीकार याना वयाच्वंगुलिं हे अथे छगू दलं मेगु दलया नेतातया प्रधानमन्त्रीया रुपय् प्रस्ताव तयेगु ज्या जूगु खः धाःगु दु ।
