एमाले नेता पोखरेलयात आक्रमण
एमाले महासचिव ईश्वर पोखरेलयात आइतवाः सनिलय् माओवादी कार्यकर्तां आक्रमण याःगु दु ।
रामेछापय् जूगु ज्याझ्व क्वचायेकाः लिहां वनेगु झ्वलय् वयेकयात माओवादी कार्यकतां अप्पां कायेकूगु खः । सनिलय् खुताः ईलय् जूगु उगु घटनाय् महासचिव पोखरेल च्वनाः वःगु गाडीइ धाःसाः छुं क्षति मजू । तर वयां लिपाः वयाच्वंगु संचारकर्मीया गाडी धासाः क्षति जूगु दु ।
महासचिव पोखरेलयात सुरक्षा प्रदान याना न्ह्यने वनाच्वंगु प्रहरी पुचःलं तत्काल स्थिति नियन्त्रणय् कायेत झिंन्ह्य्गू राउण्ड हवाइ फायर याःगु खः ।
प्रहरीया कथं हवाइ फायर लिपाः माओवादी कार्यकर्ता तितबितर जुया बिस्यूवंगु खः । घटना लिपाः सतकय् अवरोध चीकाः महासचिव पोखरेलयात सकुशल येँय हःगु खः । उगु घटना लिपाः रामेछाप सदरमुकाम मन्थलीपाखें सशस्त्र प्रहरीया पुचः घटनास्थल पाखे छ्वःगु खँ प्रहरीं धाःगु दु ।
थ्वस्वयां न्ह्यः मन्थली जूगु छगू ज्याझ्वलय् न्ववायेगु झ्वलय् महासचिव पोखरेलं माओवादीया हिंसात्मक ज्याया प्रतिवाद यायेत थः कार्यकर्तातय्त निर्देशन बियादीगु खः ।
