प्रमया राजीनामा बारे नेतातय् बिचाः
येँ (सन्ध्या टाइम्स)/नेपाली कांग्रेस संसदीय दलया नेता रामचन्द्र पौडेलं थौं सुथय् जूगु न्यागू बुँदाया सहमति कथं प्रधानमन्त्री झलनाथ खनालं तुरुन्त हे राजीनामा बियादी धयादीगु दु। स्वंगू दलया शीर्ष नेतातय् दथुइ सहमति जूकथं प्रधानमन्त्रीया राजीनामाया खँ नं न्ह्यथनातःगु दु ।
थौं सुथय् संविधानसभाया बैठक क्वचायेकाः लिहां वयेगु झ्वलय् संचारकर्मीतलिसे खँल्हासें नेता पौडेलं अथे धयादीगु खः। वय्कलं स्वलाया दुने माओवादीं ल्वाभःया ताःचा जक मखु ल्वाभः हे सरकारयात लःल्हाइ धकाः नं धयादिल ।
अथे हे प्रधानमन्त्री खनालं धाःसा थौं सुथय् हे संचारकर्मीतय्गु न्ह्यसःया लिबः बिसें राष्ट्रिय सरकारया विकल्प तयार जुइधुकाः थम्हं राजीनामा बीगु जुइ धयादिल ।
राजीनामा गबलय् तक बियादी धकाः संविधानसभा भवन पिने संचारकर्मीतय्सं न्यंगु न्ह्यसःया लिसलय् प्रधानमन्त्री खनालं धयादिल 'टाइम ला आः स्वस्वं वने।'
'गबलय् राष्ट्रिय सहमति जुइ अबलय् हे जिं नं राजीनामा बीगु जुइ।' वय्कलं स्वलाया दुने संविधानया न्हापांगु मस्यौदा वइगु नापं शान्ति प्रक्रिया पूरा जुइ धकाः धयादीगु दु ।
अथे हे एकीकृत माओवादीया उपाध्यक्ष डा. बाबुराम भट्टराईं नं सीत्यंगु संविधानसभायात म्वाकेगु ज्या यानाः महत्वपूर्णगु उपलब्धी जूगु दु धकाः टिप्पणी यानादिल। वय्कलं राष्ट्रिय सहमतिया वातावरण तयार जुइवं हे प्रधानमन्त्री खनालं थःगु पदं राजीनामा बियादी धकाः नं धयादीगु दु ।
अथे हे पुलांम्ह प्रधानमन्त्री नापं एमालेया बरिष्ठ नेता माधव कुमार नेपालं राजीनामा याकनं नं हे वयेफु, लिबाये नं फु धयादिल ।
