ठमेलं अमेरिकी पर्यटक अपहरण
येँ (सन्ध्या टाइम्स)/नेपाल पर्यटन वर्ष २०११ हनाच्वंगु हे इलय् येँया ठमेल लागां छम्ह अमेरिकी पर्यटक अपहरण जूगु दु। अमेरिकी नागरिक जोन रोबर्टयात नेपाली सेनाया कर्मचारी धकाः म्हसीका बिउपिं निम्ह मनूतय्सं अपहरण याना यंकूगु खः। उमिसं रोबर्ट च्वनाच्वंगु होटल ड्रीमं चान्हय् २ बजे रोबर्टयात यंकूगु खँ प्रहरीं धाःगु दु ।
पर्यटक रोबर्ट स्वला न्ह्यवंनिसें हे उगु होटलय् च्वनाः वयाच्वंगु खँ होटलया संचालक राजेन्द्र पोखरेलं धयादीगु खः। पोखरेलं धाः कथं होटलया कर्मचारीतसें गेट चायेकेवं थःपिं नेपाली सेनाया कर्मचारी खः धकाः दुहां वःपिं उमिसं होटलय् उम्ह पर्यटक च्वनाच्वंगु क्वथाय् वनाः वयात नियन्त्रणय् काःगु खः ।
होटल कर्मचारीतय्सं दुमकायेगु कुतः याःगु इलय् इमिसं थःपिं नेपाली सेनाया विशेष अनुसन्धान ब्यूरोया दुजः खः व पर्यटक जोन लागू औषध कारोवार यानाच्वंम्ह जूगुलिं अनुसन्धानया निंतिं काः वयागु खः धासें ट्याक्सीइ तयाः अज्ञात थासय् यंकूगु खः। इमिसं जोनयाके दुगु ध्यबा नापं मेमेगु सामान नं यंकूगु दु ।
उगु घटना जुइ धुनेवं होटल कर्मचारीतय्सं प्रहरीयात खबर याःगु खःसा प्रहरीं येँया फुक्क नाका बन्द यानाः अपहरणकारी व पर्यटक जोनयात मालेगु ज्या यानाच्वंगु जूसां माले फयाच्वंगु मदु। थ्वहे दथुइ पर्यटक जोनया क्वथां चीधंगु परिमाणय् लागू वासः व गजि नं लुयावःगु दु ।
