इयू राष्ट्रया राजदूततय्सं म्याद थपया स्वागत
नेपाःस्थित युरोपियन युनियन (इयू) राष्ट्र नापं नर्वे व स्वीट्जरल्याण्डया राजदूततय्सं संविधानसभाया म्याद थपया स्वागत याःगु दु ।
राजदूततय्सं आइतवाः छगू विज्ञप्ति पिथनाः नेपाःया राजनीतिक दलत दथुइ सहमतिया माध्यमं हे म्याद थप जूगु प्रति लसता प्वंकूसे स्वलाया म्याद थपं दलतय् न्ह्यने प्रजातान्त्रिक व समावेशी संविधान च्वयेगु ह्वताः वःगु खँ न्ह्यथंगु दु ।
नेपाःया प्रतिनिधितय्सं न्हूगु संविधान, शान्ति, स्थायित्व व समृद्धि हयेगु सहमति यायेधुंकाः जक नेपाःमितय् आकांक्षा पूवनीगु खँ विज्ञप्तिइ न्ह्थयनातःगु दु ।
अथेहे लडाकु समयोजन व पुनःस्थापना सम्बन्धय् नेपाःया राजनीकि दलत दथुइ जूगु सहमति निष्कर्षय् थ्यंकेगु निश्चित यायेत इनाप यासें राजदूततय्सं नेपाःया शान्ति प्रक्रियाय् इयू, नर्वे व स्वीट्जरल्याण्डया पूर्ण समर्थन दुगु खँ धाःगु दु ।
