थौं प्यक्वःगु गणतन्त्र दिवस
देशय् विधिवत रुपं राजतन्त्रया अन्त्य जुयाः गणतन्त्र पलिस्था जूगु थौं प्यदँ क्यंगु दु । २०६४ सालय् जूगु संविधानसभाया निर्वाचन लिपा २०६५साल जेठ १५ गते च्वंगु न्हापांगु संविधानसभाया मुँज्यां गणतन्त्रया घोषणा याःगु खः ।
गणतन्त्रया लसताय् थौं देय्न्यंक थीथी ज्याझ्वः जुयाच्वंगु दुसाः येँया तिंख्यलय् सरकारं छगू विषेश ज्याझ्वः यायेत्यंगु दु । विशेष ज्याझ्वःया निंतिं सरकारं उपप्रधान नापं अर्थमन्त्री भरतमोहन अधिकारीया नेतृत्वय् गणतन्त्र दिवस २०६८ मूल समारोह समिति नीस्वंगु खः ।
गणतन्त्र दिवसया हे लसताय् राष्ट्रपति डा. रामवरण यादवं छगू भिंतुना सन्देश बियादीगु दु । वय्कलं राजनीतिक दलत दथुइ आपसी सहमति व विश्वासया वातावरण दयेकाः संविधान निर्माणया प्रक्रियायात पूवंकेगु विकल्प मदुगु खँ धयादीगु दु । वय्कलं आःया ऐतिहासिक घडिइ न्हापा प्राप्त जूगु लोकतान्त्रिक उपलब्धीयात संस्थागत यायेमफुगु धयादिसें अग्रगमनया दिशाय् सचेल पला न्ह्याकेगु उचित जुइगु खँ न्ह्यनादीगु दु ।
