अन्ततः संविधानसभाया म्याद थप यायेगु सहमति
अन्ततः राजनीतिक दलतय्सं संविधानसभाया म्याद थप यायेगु निर्णय याःगु दु । संविधान सभाया म्याद स्वला अप्वयेकेत अन्तरिम संविधान नवौँ संशोधनया विधेयक दुई तिहाइ बहुमतं पारित जूगु दु ।
मतदानय् सहभागी ५०८ मध्ये ५०४ मत पक्षय् वंगु खःसा विपक्षय् प्यंगू जक मत वंगु खः । सभामुख सुवास नेम्वाङं दुई तिहाइ बहुमतं विधेयक पारित जूगु घोषणा यानादिल । नकतिनि हे राष्ट्रपति रामवरण यादवं संसदं पास जूगु संविधान संशोधन विधेयक प्रमाणिकरण याःगु दु ।
प्रमुख स्वंगू राजनीतिक दलत दथुइ संविधानसभाया म्याद थप, राष्ट्रिय समहमतिया संयुक्त सरकार गठन लगायतया विषयलय् सहमति लिपा संसदं संविधानसभाया म्याद बहुमतं पारित या:गु ख: ।
स्वंगू दलया शीर्ष नेतातय्सं ल्हाःचिं तःगु न्यागु बुँदे सहमति :
१. स्वला दुने शान्ति प्रक्रियाया मूलभूत ज्या क्वचायेकीगु ।
२. स्वला दुने संविधानसभापाखें संविधानया न्हापांगु मस्यौदा तयार यायेगु ।
३. नेपाली सेनायात समावेशी दयेकेगु लगायतया मधेसी मोर्चानाप न्हापा जूगु सहमतित प्रभावकारी कार्यान्वयन यायेगु ।
४. संविधानसभाया समयावधि स्वाल थप यायेगु ।
५. राष्ट्रिय समहमतिया संयुक्त सरकार गठनया निंतिं प्रधानमन्त्री राजीनामा यानाः मार्गप्रशस्त यायेगु ।
