संसदय् छु जुयाच्वन ? (लाइभ अपडेट)

सुथय् ८ बजे सुरु जुइगु धाःगु व्यवस्थापिका संसदया मुँज्या बहनी ११:१०बजेय् न्ह्याःगु दु । अझ नं दलत दथुइ वार्ता जुयाच्वंगु दुसां संसदया मुँज्या धाःसा न्ह्याःगु दु । तर दलत दथुइ सहमति जूगु खः वा मखु धइगु बारे स्पष्ट जुइमफुनी ।

संसदय् छु जुयाच्वन?

संविधान सभाया म्याद तीन महिना अप्वयेकेत अन्तरिम संविधान नवौँ संशोधनया विधेयक दुई तिहाइ बहुमतं पारित जूगु दु ।

मतदानय् सहभागी ५०८ मध्ये ५०४ मत पक्षय् वंगु खःसा विपक्षय् प्यंगू जक मत वंगु खः । सभामुख सुवास नेम्वाङं दुई तिहाइ बहुमतं विधेयक पारित जूगु घोषणा यानादिल । नकतिनि हे राष्ट्रपति रामवरण यादवं संसदं पास जूगु संविधान संशोधन विधेयक प्रमाणिकरण याःगु दु ।

-- साढे चार बजे स्वक्वःगु मुँज्या न्ह्याःगु दु ।

-- संविधान सभाया म्याद थप यायेत संविधान संशोधनया विधेयक पास यायेत च्वंगु व्यवस्थापिका संसदया निक्वःगु मुँज्या आधा घण्टाया लागि स्थगित जूगु दु ।

-- सुथया सवा तीन बजे हानं संसद न्ह्याःगु दु ।

-- संसदया मुँज्या १५ मिनेटया निंतिं स्थगित ।

-- राप्रपा नेपालयया सभासद् चन्द्रबहादुर गुरुङं संविधान संशोधन प्रस्तावया विरुद्ध दर्ता याःगु विरोध सूचना बहुमतं अस्वीकृत ।

-- कानुन तथा न्याय मन्त्री प्रभु शाह पाखें सभासद् गुरुङं संविधान संशोधन प्रस्तावया विरुद्ध दर्ता याःगु विरोध सूचना लिसः बियादिसें उगु विरोध सूचना लितकायेत इनाप ।

-- संविधानसभाया म्याद थप यायेगु संविधान संशोधन प्रस्तावयात राप्रपा नेपालयया सभासद् चन्द्रबहादुर गुरुङपाखें विरोध । संविधान संशोधनया औचित्य मदुगु दावी । प्रस्ताव लितकायेत सरकारयात इनाप ।